'டவுட்ராசு'வின் சந்தேகங்கள்-உங்களுக்கு பதில் தெரியுமா?

   போன வாரம் மின்சார ரயிலில் ஆபீஸ் போய்க்கிட்டிருந்தபோது  என்னுடன் ஏழாம் வகுப்பு படித்த தங்கராசு மாம்பலத்தில் ட்ரெயினில் ஏற அதைப் பார்த்த நான் எங்கே என்னைப் பார்த்துவிடுவானோன்னு பயந்து வேற பக்கமா திரும்பி நின்னுகிட்டேன்.

        அவனைபாத்து நீங்க ஏன் பயப்படுனும்னு நீங்க கேக்கறது எனக்கு புரியுது.? அவனைப் பத்தி உங்களுக்கு தெரியாது.டவுட்டு கேட்டே நம்மள சாகடிச்சிடுவான் சார்!அவனுக்கு வர்ற டவுட்டுக்கு பதில் சொல்ல முடியாது . ஏழாவது படிக்கும்போது எங்க ஹிஸ்டரி வாத்தியரையே திணற அடிச்சவன் சார்! அவன்.

     ஒரு நாள் வாத்தியார் உலகம் உருண்டை ன்றத பத்தி விளக்கமா சொல்லிக்கிட்டிருந்தார்.எல்லாம் முடிஞ்சதும் வாத்தியார் ஒரு ஆர்வக் கோளாறுல ஏதாவது டவுட் இருந்தா கேளுங்கன்னு சொன்னார்.

 உடனே தங்கராசு எழுந்தான் சார்.

    "சார் உலகம் உருண்டைததானே!அது தன்னைத்தானே சுத்துதுன்னு சொன்னீங்க அப்படின்னா ஏரோப்ளேன் ல ஒரு ஊர்ல இருந்து இன்னொரு ஊருக்குப் போறதுக்கு பறந்து போகாம மேல உயரமா போய் அப்படியே நின்னுக்கிட்டா பூமி  சுத்தும்போது நாம போக வேண்டிய ஊரு ஏரோப்ளேனுக்கு கீழ வரும்போது அப்படியே இறங்கலாம் இல்லே!" என்று கேட்டதும் மாணவர்கள் எல்லாம் சிரிக்க வாத்தியார் ஒரு நிமிடம் திகைச்சு போய் நின்னுட்டார்.

    அப்புறம் ஏதோ ஒண்ணை சொல்லி சமாளிச்சார் ஆசிரியர். ரொம்ப குஷியான தங்கராசு அன்னையிலிருந்து கண்ட மேனிக்கு கேள்வி கேட்டு வாத்தியார் டீச்சரை திணற அடிக்கறதையே தொழிலா வச்சுகிட்டான்.

   தங்கராசுங்கற அவன் பேரு டவுட் ராசுன்னு மாறி போச்சு.வாத்தியாரை வறுத்து எடுக்கறது மத்த ஸ்டூடன்ட்சுக்கு ரொம்ப சந்தோஷமா இருந்தது.ஆனா ஒரு கட்டத்தில வாத்தியார் டீச்சரோடு சேர்த்து மற்ற ஸ்டூடன்ட்ஸ் கிட்டயும் தன் டவுட்டு வெறிய காமிக்க டவுட் ராசுவைப் பாத்து எல்லாம் நடுங்க ஆரம்பிச்சிட்டாங்க. ஒருநாள் அவன் ஸ்கூலுக்கு வரலன்னா எல்லோரும் சந்தோஷப் பட்டாங்க.அந்த அளவுக்கு டவுட் டார்ச்சர் பண்ணுவான்.

         அடுத்த வருஷம் நான் வேற ஸ்கூலுக்கு போயிட்டேன்.அப்புறம் ரொம்ப வருஷங்களுக்குப் பிறகு அவனை தாம்பரத்தில பாத்தேன்.அவன்தானான்னு எனக்கு டவுட்டா இருந்துச்சு. அவனோ இந்த  ஒரு விஷயத்தில டவுட்டே இல்லாம என்னை கண்டுபிடிச்சிட்டான். அவனோட டவுட்டு வெறிக்கு ஒரு விஞ்ஞானியா ஆயிருப்பான்னு நினைச்சேன். ஆனா அப்படியெல்லாம் நடக்கல.  எங்கயோ கிளார்க்கா ஒர்க் பண்ணிக்கிட்டு இப்பவும் டவுட்டு கேட்டு டார் டாரா கிழிக்கிறானாம் சார். இன்னமும் மாறாத அவன் அன்னைக்கு என்னை புடிச்சு வச்சுக்கிட்டு பத்து இடத்தில பஞ்சர் ஓட்டுன ட்யூப்பா ஆக்கிட்டான் சார்.

        அப்படிப்பட்ட டவுட் ராசுவைத்தான் பாத்து ஒளிஞ்சிகிட்டது நியாம்தானே சார். ஆனா என் கஷ்ட காலம் அவன் என்னை பாத்துட்டான்

     நெரிசல்ல நுழைஞ்சு என் பக்கத்தில் வந்து முதுகை தட்டி,

"ஹாய், முரளி எப்படி இருக்க? பாத்து ரொம்ப நாளாச்சி..."என்று ஆரம்பிக்க ..,அதற்குள் ஒரு போன்கால் வர இத வச்சு எக்மோர் வரை எப்படியாவது சமாளிச்சிடலாம்னு சிக்னல் கிடைக்காதமாதிரி அந்தப் பக்கம்  திரும்பி நின்னு கால் அட்டென் பண்ணா ,"நான்தாண்டா தங்கராசு பேசறேன்.உன் நம்பர்தானான்னு செக் பன்னேன்" னு சொல்லி அதிரவைத்தான்.

    அப்புறம் வேற வழியில்லாம ராஜேந்திரகுமார் கதாபாத்திரம் மாதிரி நான் "ஙே" என்று விழிக்க டவுட் ராசு கண்டிநியூ பண்ணான்.   "இப்ப மடிப்பாக்த்தில இருக்கயாமே.மடிப்பாக்கம் பூந்தமல்லி பக்கம்தானே இருக்கு " என்று கேட்டு அழவைத்தான். 

எக்மோர்  வரதுக்குள்ள அவன் கேட்ட டவுட்டுக்கு பதில் சொல்ல முடியாம  நான் பட்ட அவஸ்தையை நீங்களும்  எப்படி இருக்கும்னு நீங்களே பாருங்க! இன்பத்தையும் துன்பத்தையும் பகிர்ந்துகொள்ளத்தானே பதிவுலகம் இருக்கு.

இதோ டவுட் ராசுவின் சில டவுட்டுகள்.

1. ஒல்லியா இருக்கிற ஊசிய குன்டூசின்னு ஏன் சொல்லறாங்க?
2.  ஒருத்தரை புகழ்ந்து சொன்னாலோ ஜால்ரா போட்டாலோ காக்கா புடிக்கிறான்னு ஏன்னு சொல்றாங்க? காக்காய்க்கும் அதுக்கும் என்ன சம்பந்தம்?
3. முருகன்  பெருமைய சொல்ற திருப்புகழ் பாடல்கள் எல்லாம் பெருமாளேன்னு முடியுதே ஏன்?முருகனும் பெருமாளும் ஒண்ணா?
4. பேங்க்ல கிழிஞ்ச ரூபாய் நோட்டை கொடுத்தா கிழிஞ்ச இடத்த பிரவுன் பேப்பர்ல ஓட்டச் சொல்றாங்களே!செல்லோ டேப்ல ஓட்டினா ஒத்துக்க மாட்டேங்கறாங்களே ஏன்?
5. எல்லா சாப்பாட்டு வகையிலும்தான் உப்பு போடறாங்களே! உப்புமாவுக்கு மட்டும் அந்தப் பேர் எப்படி வந்தது.?
6. ஹோட்டல்ல மட்டும் ஒரு காபி சாப்பிட்டிட்டு 1000 ரூபாய் நீட்டினாலும் சில்லறை இல்லைன்னு சொல்லாம குடுக்குறாங்களே ஏன்?
7. பேய்க்கு வாழ்க்கை பட்டா  புளிய மரம் ஏறித் தான் ஆகணும்னு சொல்றாங்களே! ஏன்? நீ புளிய மரம் ஏறி இருக்கியா?(என்னா வில்லத்தனம்)
8. துணை ஜனாதிபதி, துணை ஜனாதிபதி ன்னு சொல்லறாங்களே அவருக்கு என்ன வேலை?
9. செவ்வாய் கிரகத்தில ......

          என்று சொல்லிக் கொண்டிருக்கும்போதே எக்மோர் ஸ்டேஷன் வர அப்புறம் பாக்கலாம் என்று இறங்கி   ஓடினேன். 

**************************************

இதையும்  படியுங்க

செவ்வாய் கிரகம்-தொட்டுவிடும் தூரம்தான்