மேகம் எனக்கொரு கவிதை தரும்

மேகங்கள் வெண்ணிலவு  காயவைத்த  கைக்குட்டைகள்

  மேகங்கள்

   மழை நூல்

நூற்கும்

 பஞ்சுகள்

மேகங்கள் 

விண்கடலில்

மிதக்கும் 

வெண்படகுகள்

மேகங்கள் இடி இசையை உருவாக்கும் இசைக்கருவிகள்                          மேகங்கள்    மின்னல்    உற்பத்தி செய்யும்   மின்னாலைகள்      மேகங்கள்        கருணையின்       உருவகங்கள்                                                                                                                                                   மேகங்கள்   வெய்யில்   தடுக்கும்          வெண்கொற்றக்       கொடைகள்                                                                     மேகங்கள்  காற்றின் திசையில்  பறக்கும்  நூலில்லா காற்றாடிகள்                                                                           மேகங்கள்     நினைத்த உருவமாய் காட்சி அளிக்கும் அற்புதங்கள்                                                                             மேகங்கள்    பூமிப் பந்தின்    பறக்கும்    போர்வைகள் மேகங்கள்  கன்னியரின்  கவர்ச்சிமிகு  கார் குழல்கள் மேகங்கள்  கவிஞர்களின்  கற்பனைக்கு  தீனிபோடும்  கருப்பொருள்கள்        மேகங்கள் காதலுக்கு  தூது போகும்   வெண்புறாக்கள் மேகங்கள்  மழைத் துளிகள்  சுமந்து செல்லும்  விமானங்கள்   மேகங்கள்    மலை முகடுகளைப்    முட்டிப்பார்க்கும்    வெண்பட்டுப்      பறவைகள்                                                                        வாழ்க மேகங்கள்!   வளர்க மேகங்கள்!

எது கவிதை?

     சொற்களை கூட்டு சேர்த்து
          சொல்வது அல்ல கவிதை
     விற்பனை செய்ய விரைவாய்
          எழுதுவது அல்ல கவிதை
     கற்பனை செடியில் பூக்கும்
          கவின்மிகு கருத்து கவிதை
     பற்பல வடிவில் கவிதை
          உள்ளதை பார்ப்போம் வாரீர்!


     துடிக்கின்ற இளமை கவிதை

          துயரிலா வாழ்க்கை  கவிதை

     படிக் கின்றபோது இன்பம்
          தருகின்ற நூல்கள் கவிதை
     கடிக்கின்ற எறும்புக் கூட்டம்
          செல்கின்ற வரிசை கவிதை
     இடிக்கின்ற இடியின் ஒலியும்
          இணையிலா இயற்கை கவிதை


     காற்றுக்கு தலையை ஆட்டும்
          நாற்றுக்கள் நடனம் கவிதை
     ஆற்றுக்குள் நீந்தி ஆடும்
         அழகிய மீன்கள் கவிதை
     சேற்றுக்குள் முளைக்கும் நல்ல
         செந்நிறக் கமலம் கவிதை
     ஊற்றுக்கண் கண்டு பொங்கும்
         உழவனின் உள்ளம் கவிதை


     மலர்ந்திடும் பூக்கள் கவிதை
         மரங்களின் அசைவும் கவிதை
     புலர்ந்திடும் காலைப் பொழுதின்
         காட்சியும் புதுமைக் கவிதை
     வளர்ந்திடும் நிலவும் கவிதை
         வடிவிலா மேகம் கவிதை
     தளர்ந்திடும் முதுமை வரினும்
         தளர்வுறாக்  காதல் கவிதை